破．地獄｜衛詩雅封后一刻湧現人生走馬燈　忙到連屋企都返錯 | 香港01

電影《破．地獄》昨晚（25日）舉行名人優先場，除衛詩雅、周家怡、梁雍婷外，連詩雅、伍允龍、寶珮如、陳煒、張繼聰亦有撐場。

衛詩雅早前憑電影獲得第39屆華鼎獎「華語最佳影視女演員」，對於首次封后，衛詩雅表示無論大小獎、甚至係媽媽雕花雕一個獎畀佢都會感到開心，因為是肯定與認可。而被叫上台一刻，她笑言如同人生走馬燈一樣，不同的畫面湧現。

問到未婚夫有咩表示，衛詩雅話返到屋企時，對方雖然已入睡但一於叫醒：「佢有交戲嘅，但第二日醒咗有認真望個獎。」

至於所有慶祝飯局，衛詩雅話要等完東京電影節再進行，她又指近來十分忙碌，忙到連屋企都返錯：「唔知點解看更會開門畀我，我上到樓層後，準備除鞋，但點解啲鞋無見過嘅，再望望度門又唔同色，我後來落返樓下，原來我去咗第二座。嗰時已經係凌晨一點，好彩無按門鈴。」

提到電影未上映已贏盡口碑，周家怡、衛詩雅、梁雍婷都話之後會參與謝票場：「希望落力參與可以呼喚兩位主演出嚟，我覺得應該要。好似聽講票房好好，佢哋會不定時出現。」

衛詩雅首奪女演員獎　華鼎獎封后：呢個獎對我太重要！

第39屆華鼎獎昨晚（23日）於澳門舉行，去年憑《不日成婚2》首次獲香港電影金像獎「最佳女主角」提名的衛詩雅（Michelle），憑電影《破·地獄》獲得第39屆華鼎獎「華語最佳影視女演員」；方中信則憑電影《金手指》於第三屆澳淶塢五大洲電影節金莉花獎獲得「全球最佳男配角」獎項。石修及歐陽震華則受邀擔任「全球最佳男、女配角」及「全球最佳女演員」頒獎嘉賓。

Michelle近年屢獲電影獎項提名，這次得獎她表示非常激動，認為無論任何獎項，對她來會都是一個肯定及被看見的機會，「呢個獎對我嚟講太重要啦！對演員嚟講係一個肯定。亦都係提醒人哋：『我仲喺呢行㗎，大家可以搵我演戲。』憑《破·地獄》呢套電影得到嘅獎項即係代表大家好喜歡我哋嘅電影，所以好開心。」

問到會否增加來屆金像獎提名的信心，她坦言：「感覺會實在啲，信心係高咗嘅。」

電影《破·地獄》中，Michelle飾演一名救護員，她表示這個角色無論在體能及心理上都有很大發揮。

「心理上嘅話就係大家睇過呢套電影就會明白嗰種沉鬱，長時間培養沉鬱嘅情緒，每日同屋企人好多矛盾、好多爭吵，所以嗰段時間係難過嘅；體能上除咗要練一啲儀式上嘅嘢，亦都要人做好多體能體力嘅瞓練，因為角色係一個救護員，自己對呢方面要求比較高，好希望最貼近個角色，所以有嗰一刻開始我每日都去做gym，嗰段時間體能真係幾好，同埋大隻咗好多，經過呢啲瞓練，之後我真係可以『稱」到個人上救護床。」

最難忘的是跟許冠文拍攝一幕洗澡戲，令她學到何謂敬業樂業。

「Michael神喺戲入面飾演我爸爸，有一場戲係我要幫佢沖涼，我記得拍攝嘅時候係冬天，好凍，所有劇組都擔心，佢反而話：『唔緊要㗎，你哋拍到OK先。』佢為我哋嘅畫面、劇情需要行先，好唔錫身咁樣，我又心痛，覺得好深刻又覺得好犀利，好尊敬佢，喺佢身上面絕對學到乜嘢叫做敬業樂業。」