陳曉華角逐「女配」唔知朱敏瀚有冇投票：唔通問人攞返Crop圖咩 | 香港01

陳曉華（Hera）今日（14/1）現身電視城出席《萬千星輝頒獎典禮2024》「最佳男、女配角」最後十強候選人記者會。Hera今年成續不俗，有份角逐3個獎項，包括有「最佳女配角」、「飛躍進步女藝員」及「馬來西亞最喜愛TVB女主角」，與其他強勁對手力爭獎項。

Hera接受《香港01》訪問時表示：「今年係我人生第一次獲提名《最佳女配角》，雖然有3個獎項可以角逐，但講到有冇信心可以攞獎，其實就真係冇乜信心。不過我都會盡力咁去拉票，因為我覺得票數係好影響個賽果。喺《女配》當中嘅對手，好似黃翠如同楊卓娜佢哋都係好犀利，咁所以無論邊一個攞呢個獎，都係一件好開心嘅事嚟。

（有冇叫朱敏瀚投你票？）我已經叫曬所有朋友投我票。（有冇睇住朱敏瀚投先？）我就冇求證嘅，因為大家同朋友之間係講信嘅，唔通問人攞返Crop圖咩，證明有投我票。」

被問到有否拜神祈福成功奪獎？Hera表示：「其實我同屋企人一向都有拜神嘅習慣，不過我就冇特登為一件事去求，只會祈求健健康康，順順利利。當我真係有時間嘅時候都會去廟拜神。之前試過有一年冇去拜神，嗰年屋企就有啲事發生咗。咁所以就覺得，既然由細到大都有拜神嘅話，咁就要保持返呢個習慣。」

羅天宇眼見陳懿德獨自回應「雪糕事件」感痛心：被人問到好慘 | 香港01

羅天宇今日（14/1）現身電視城出席《萬千星輝頒獎典禮2024》「最佳男、女配角」最後十強候選人記者會。羅天宇接受《香港01》訪問時表示：「其實今年係好精彩，一開頭嘅時候，我係有11個提名，有《最佳劇集》，有4套劇嘅《男配》等等，但好無奈除咗《最佳劇集》之外，就只得一個《男配》，入咗最後十強。

咁所以個機率都比較低，因為有4套入，就只得一套得，咁所以希望大家可以多啲投我票，始終入十強都係好難，有大家投票嘅支持都好重要。」

提到早前買雪糕夜訪陳懿德香閨斷正，羅天宇笑言：「其實嗰日我哋係約咗成班朋友去佢屋企玩，嗰日我做完嘢之後就入去搵佢哋，然後就俾人影到我去買雪糕，真係唔好意思，見到佢就呢件事要回應，被人問到好慘。同埋啲雪糕佢係好似冇食到，因為都俾其他人搶曬。其實之前聖誕節我哋成班朋友都有去佢屋企玩，大家都有喺聖誕樹度影相，自己影完都唔敢Po，都怕俾人攞嚟寫。

（新年會唔會去佢屋企玩？）唔知，睇佢搞唔搞。（你敢唔敢去先？）都OK嘅，因為大家都慣咗，同埋同佢屋企人都熟絡，都可能去逗利是。」