黃劍文計劃操肌配合挑戰出跳唱歌 重踏追夢起點 澳洲行感觸到喊

黃劍文（Kimman）形容去年是圓滿的1年，完成了多項心愿，又再次踏足追夢起步點澳洲，令他一度感觸到喊，感恩自己努力堅持有今天成績。他希望今年能保持步伐，挑戰更多新工作，其中最想推出跳唱快歌，更計劃努力操肌配合。

採訪：杜杜 攝影：林賓尼 髮型:Brian Lukby Hair Corner 服裝:尺渡.Man 場地:The AIR (The ONE)

Kimman參加完《中年好聲音2》後忙足1年，但完成了多個目標好充實，「做咗好多嘢，雖然少休息，但好似1年裡面成就咗好多要追嘅夢，可以出到新歌《默默》，演到音樂劇《為你鍾情》，做埋同葉巧琳合唱歌《盡頭重遇你》，又做咗65場學校分享會，10月22日舉行咗自己演唱會《Stand By Kimman》，10月23日再飛去澳洲做分享會。」

期待再有演戲機會

提到澳洲之行，Kimman感受特別深，期間更一度流下男子淚，「好似返去交功課咁，10幾年前喺嗰度工作假期咗1年半，嗰時開始以音樂為生，busking同做歌，起步去追夢，好耐冇返去，見到人busking好激動忍唔住喊，諗返嗰時好似噚日發生嘅事，自己有今日嘅成績係因為冇放棄，對我好大鼓勵。」

此行他見返不少好朋友，行程亦相當緊密，「去咗3個城巿，做咗12場分享會，又有唱歌，以前掛住busking，冇時間睇真啲個城巿，今次可以慢慢睇，加上差唔多聖誕節，好多布置好靚，亦咗啲禮物返香港。」

講到今年願望，Kimman想繼續充實，亦打算推出快歌等，作不同嘗試，「要keep住步伐好似好簡單，其實唔容易，想做多啲唔同作品，同勇敢挑戰快歌，仲要跳埋舞。」

會否騷肌配合快歌？他直言演唱會後不再抗拒，「以前唔會想做gym，但演唱會前跟過教練後，就有動力再做，真係著衫好睇咗。」

繼客串《愛．回家》小巴司機「尊扇」後，他想有機會再演戲，「嗰次客串完反應幾好，都想再演多次，但我唔識揸車可能要學嚇先，如果有其他角色都唔錯。」

他又期望有機會跟「中二生」齊拍綜藝，「拍旅遊節目應該幾好玩，可以一齊去澳洲，我熟嘛！」