秦煌唔覺係悲慘老人家：最緊要心態好 孤獨過80大壽只求有美食

因行動不便入住護老院大半年的秦煌，於2月16日在老人院渡了第一個生日，雖然院內不設慶祝活動，亦沒有他期望中，能夠跟家人開開心心，簡簡單單出外食餐飯的畫面，但當日卻喜獲《星島頭條》記者送上生日蛋糕及恨食了多年的雲吞麵。

秦煌心態好，不覺得自己是悲慘老人家，反而捧住碗雲吞麵和生日蛋糕笑騎騎，滿足說：「趁有牙食得就食！」 採訪：方騫平 攝影：羅安強

80大壽當天，壽星公秦煌身穿深藍色上衣配襯同色系cap帽，打扮醒神，尤其捧住記者送來的生日蛋糕時更開心到爆猛話：「好靚！」

珍而重之表示要留來做宵夜，更指定要交給相熟的夜更女工保管：「唔好畀人偷食！」被問到是否刻意打扮過生日時？煌哥即大笑說：「又唔係？日日都係咁！」

仔女情人唔見人

對於當天子女冇現身；內地情人知己Mary都冇影，秦煌在院內有點孤寂，他卻秒速為子女解畫：「佢哋要返工，我都唔想搞到咁大陣仗。(咁會否好失望？) 冇失望，呢啲唔關佢事㗎，以前我要返工要做嘢，係我一直教養落嚟冇做到(關心)呢啲嘢，變咗相處方式比較疏離。」

至於Mary的事，他就形容都過去了：「呢啲係60歲嘅事，佢過得開心我就開心，家大家經已少聯絡。」秦煌又為寂寞生日打圓場：「哈！我都唔再重視80歲喇，因為家過咗80歲，目標一定係超過90，有90目標就望100，我哋屋企人好長命，所以唔好衰畀佢哋睇。」

快樂不知時日過

談到生日願望，他就安於現狀：「生日冇特別嘢，都係自己開心啫，最開心係唔使擔心財困，唔會好似以前咁憂柴憂米急於搵嘢做。呢一年都ok㗎，除咗有3餐溫飽，仲由政府供住，住嘅老人院單人房又咁大間，仲有4000幾蚊綜援金做零用錢，有時仔女會畀啲錢我，邊度使得曬啫？我家好ok㗎，80歲個人好精神又食得，心態會好過以前。」

他堅持最緊要是心理質素好，做人樂觀，不會自怨自艾，還自嘲快樂不知時日過，追問2月16日究竟是星期幾？又笑說幾乎連自己生日都忘掉。現在無甚牽掛的他最開心有美食：「呢度過時過節會加餸，一人一份蝦、燒肉，啲餸多到食唔曬。啲女又會買條燒腩骨上嚟畀我食，哈…好味呀！趁住仲有牙食得就食，唔使拆啲牙(假)出嚟嘛，睇見啲人都好肉酸。」

由於老人院規定下午5時食晚飯，夜瞓的秦煌每晚都要食消夜頂肚：「我會畀錢夜班個女工買糕點畀我做消夜，大概$100食到4日；有時搵人推我落街買下零食。家天時冷仲要飲杯即溶咖啡來暖胃才瞓得著。」

生日恨食雲吞麵

講到食，秦煌最恨食是雲吞麵：「有10幾年未食過，想食好耐都唔敢出聲，女工話難買喎(咁叫仔女買啦？)唔使，嚟到都凍啦。」煌哥還想當年：「20幾年前收工會去九龍城食宵夜，嗰度啲雲吞麵、艇仔粥好靚，好想回味返當年感覺。」

他又表示年青時行得走得乜都食，後來怕腳痛戒食內臟及戒酒。對於他的雙腳仍然又黑又腫，煌哥變身「老頑童」說：「我好乖，瞓咗成3/4日床提起對腳消腫，呢個係瞓床效果，對腳開始皺皮及收水，好返好多啦…大佬呀，就算仲係腫都冇辦法啦，今年都成80歲喇，年紀大，唔會要求自己行路跑步，我仲可以企喺度，按住張檯喺尿片度『開大』，總之精神就得。」

記者完成採訪後，專誠徒步10分鐘去專門店為煌哥買雲吞麵送上驚喜，開心到不得了的煌哥話要趁熱食，就算食完晚飯都急不及待「隊」埋個麵，就湯都飲埋。老人家願望達成，衷心向記者說：「多謝你！」然後回房休息。