陳淽菁為TVB叫停怨氣：要飲水思源 被他鄉港廚故事感動

由陳淽菁主持的HOY TV電視節目《他鄉的煮人》帶大家走訪世界各地，探討港廚去到他鄉，仍然用香港人的味道，堅持發展自己事業故事。

入行31年，55歲的陳淽菁感激當日娘家為她打造了穩重司儀形象，就算離開TVB8年仍不愁冇Job做，淽菁為近日藝人對TVB怨氣發聲說：「做人要飲水思源，TVB係宣傳自己嘅重要平台。」 採訪：方騫平

原來陳淽菁一直恨與有「金牌監製」之稱的張志明合作，今次在《他鄉的煮人》終於遇上，更大讚幕後團隊相當專業，不論攝影、音樂、甚至撰稿都好出色，除美食外還拍出人情味：「尤其被日本橫濱女廚師Linda嘅故事打動，睇影片時感動到喊。」稍後淽菁返回多倫多，到時會拜訪兩位廚師，品嚐龍蝦山和叉燒拿手菜。

同老公口味唔夾

講到廚藝，陳淽菁爆出兩公婆一個小秘密：「啱啱同大律師老公張錦榮拍拖時，我試過玩煮飯仔，但只食原型食物，而且少鹽少油，清淡到佢頂唔住，佢要求食物要有鑊氣，所以第2日開始佢要自己煮，佢嘅廚藝比我更出色，而我最叻只係煲湯。」

雖然淽菁離巢8年，但多年來keep住多司儀job，即使逆市下工作依然不減：「回望TVB工資係唔高，但可以利用一個世界性嘅平台，幫到自己做宣傳，拍到啲經典劇集和做大型活動司儀，等外界對我有信心，仲有錢袋，都唔錯呀！做人要飲水思源。」

陳淽菁還會效發尊敬的前輩汪明荃及鄭裕玲，永不言休，笑說：「佢哋都唔退休，我點敢退休呀？」

淽菁更在逆市自我增值，進修寵物傳心、奇門遁甲、塔羅牌等，務求開拓更多瓣數。