俠醫｜丁子朗演大奸角姦淫擄掠無惡不作　目標是打冧陳豪：滅佢門

藝人丁子朗昨日（9日）出席TVB劇集《俠醫》的煞科晚宴，他今次於劇中飾演一名「富二代」兼無惡不作，殺人放火都有做，可以說得上是壞人的表表者。丁子朗接受《香港01》訪問時都坦言今次的角色可以說得出是人最大的挑戰：「姦淫擄掠、作姦犯科、推阿婆落樓、殺人放火全部做齊。」

丁子朗很佩服編劇能寫到這麽壞：「其實我想講呢個故事，初頭係未去到咁瘋狂，係一個奸角，因為我哋一路邊拍邊寫個結局，愈寫愈誇張。」更因為他們的一句「丁丁，你做到㗎！」

之後愈變愈壞，亦是他的一個挑戰。剛剛才在劇集《執法者們》中擺脫油膩感的丁子朗，搖身一變成為「清爽男」，他感謝網民喜歡劇中「丁小非」這個角色，他不怕劇集播出後會被壞人的形象又覆蓋：「我相信佢哋眼睛係雪亮嘅，分得出角色同真人係有分別。」

丁子朗坦言開拍前曾被質疑到底是否能勝任這個奸角，而在未開拍之前他都有一點點的懷疑：「丁子朗究竟做唔做到呢，所以我都好想挑戰自己，覺得一定俾人睇到，其實丁子朗都可以做到一個好奸嘅角色咁樣。」

在床戲方面，之前預告片中已經播出他跟劉佩玥會有床戲，他直指今次「負荷好大」，因為今次有多場的床戲。他指負荷很大原來是因為：「每次拍啲除衫戲，我要提前兩日唔食嘢，唔食啲硬質嘅，淨係食流質嘅嘢。即係我會將啲雞蛋打爛佢撈水，同埋會飲protein粉，嚟維持呢個體力。因為食硬質嘅嘢，有機會未必痾得切，有機會個肚凸咗出嚟冇咁好睇，我想每一嚿腹肌側面都好好睇。」

原來是因為他貪靚，想拍完出來的效果會好一點，所以兩天不吃固體食物，丁子朗更笑指拍完一場脫衣服鏡頭就好像拍了三天打鬥鏡頭一樣的累。

作為劇中「大奸角」的丁子朗，他表示今次的目標是陳豪：「打冧佢嘅家族生意、搶佢女朋友，做曬所有嘢都係為咗滅佢門。」但其實私底下二人都很「老友」，陳豪會親自教導他怎樣拍戲，又會給予他不少的指導，令他獲益良多。

他大爆平時陳豪拍劇很少看Playback，但竟然丁子朗拍完後卻去看Playback：「佢拍完我呢個shot之後，佢就特登問可唔可以睇呢個Playback，跟住啲Camman都話，你連自己嘅Playback都唔睇，睇丁丁嘅Playback？」真的可以說得上是「愛之深責之切」。

譚凱琪想帶小朋友外游要夾時間　聞日本會地震即表示再選地方

藝人譚凱琪昨日（9日）出席TVB劇集《俠醫》的煞科晚宴，她接受《香港01》訪問時表示今次的角色與平時的她很不同：「真係要做好多功課！」因為劇中她飾演一名有自閉症的女生，所以一定要先了解清楚才去演。

譚凱琪表示之前自己也有做過一些探訪，跟一班有自閉症的小朋友玩耍，她就從中觀察：「我就係從中觀察佢哋嘅一啲小動靜，我就會將佢哋一啲特質擺咗落去套劇度。」

其實今次飾演有自閉症的女生對於譚凱琪來說是突破自己：「即係一路以嚟公司都畀好多唔同嘅角色，即係唔同嘅路線。咁呢一個係我第一次去叫做突破少少，唔再係以前嗰啲靚靚啊，即係有個框架喺度，我今次呢一個角色係想去衝破佢，唔好理咁多嘢做好佢。」

對於小朋友即將放暑假，譚凱琪被問到會否帶他們外游，她笑指自己早上才剛從日本回來：「我真係好想同我小朋友去旅行，即係我成日一有時間我就想帶佢去睇下呢個世界，我覺得有好多嘢唔係淨係喺書嗰度學，係要畀佢哋去經歷。」但因為小朋友現在準備升k3，所以有很多面試，她不希望會撞期，所以想選擇去短途的旅行。

至於有指日本下個月會發生大地震，她被問會否先避開不去日本時，她即指：「唔知真定假，咁當然我覺得如果係可以選擇嘅咁咪咪唔好去呢啲地方住先啦，都會避免下嘅，始終小心啲好。」

而不去日本，她會選擇去哪裡時，她說有考慮過去美國：「有諗過去美國，因為嗰邊有啲屋企人喺度，就想去探下啲屋企人。」她更指女兒其實想去看雪，但就要繼續計劃能帶她去哪裡。