刑偵12丨陳自瑤自認無「人妻味」只有「 好好味」

I人性格不敢太主動只會正常社交

陳自瑤早前被《東周刊》拍到在街頭影性感靚相甩「人妻味」之餘更由早應酬到晚，積極在圈中拓展人脈。

陳自瑤多謝讚美keep得好

昨晚（20日）她出席主演劇集《刑偵12》大結局晚宴，被問到是否想甩人妻味？陳自瑤就笑指自己沒有人妻味。

問到現在是什麽味？她即笑說：「好好味！其實社會幫我哋下好多定義，結咗婚就係人妻，但係我都好想了解嚇人妻味係乜，我不嬲都好少女，當然我都好多謝大家話我keep得好好，但唔一定係少女或者人妻味，可能我係輕熟女都OK，不過我都覺得係一個讚美。」

又自爆有內地傳媒找了一張她18歲時參加活動時的照片，笑言現在只是比當時成熟了一點。

陳自瑤指結局很驚喜

至於現在是否經常應酬拓展人脈，她說：「都唔係呢排，我係一個好I嘅人，我以前覺得我好多嘢都太被動，雖然而家都唔係主動得去邊，但其實影到嘅都係做完宣傳同保怡哥佢哋去飲嘢，都唔係啲咩應酬，平時見到其他人都會傾兩句，但唔係刻意，喺平時活動或者聚會得閒就識嚇啲人，都係好平常嘅社交。」

對於《刑偵12》中的結局，陳自瑤指很驚喜，內地的朋友看完也覺得結局很爆，也有很多人捨不得她會死，因為其實自己的角色很可憐，所以很可惜，救了林保怡卻犧牲了自己的命，沒想過結局是這樣傷感。

刑偵12｜陳慧珊強調冇退休　間中客串演出唔考慮拍長劇：近排好忙

TVB懸疑劇《刑偵12》今晚（20日）迎來大結局，一眾演員齊齊出席大結局晚宴，當中驚喜客串的陳慧珊亦有現身，她在劇中以林保怡的第九個人格「守護者」出場，兩人久違同框演出，成為劇中焦點。

陳慧珊在接受《香港01》訪問被問到是甚麽原因願意客串演出時，她就表示：「我非常開心，真係好耐冇同保怡一齊拍劇，呢一場戲對我嚟講都好有意義。（咁多年冇一齊拍劇仲有冇默契？）我覺得有，之前有幾次我哋都一齊合作，有啲節目、唱歌，間唔中都會見到。」

她又大讚林保怡為人非常貼心，事關她每年生日，林保怡都很有心地傳訊息送上祝福，她亦表示二人私下關係相當好：「我哋都有聯絡嘅。」

陳慧珊久違再拍劇，與林保怡同框更勾起不少人的童年回憶，問到會不會想復出拍劇時，她就二話不說地表示：「其實我冇退過休，只不過係攞咗個博士學位（教育學博士）而家有多啲時間進入去教育嘅工作，同時間我都會間唔中拍嚇戲，大家繼續留意。（會唔會考慮拍長劇？）暫時冇諗住，近排真係好忙。」

事實上，陳慧珊這些年來都專注投入教育工作，她表示：「其實我咁多年都喺教育界發展，咁多年都有同啲教育機構合作，呢十年都做緊呢樣嘢。」近日，她更獲內地某教育機構正式受聘為「首席成長賦能官兼學習發展總監」，將其教育學博士的學術背景和豐富的教育實踐經驗，全面參與課程體系的研發與品牌戰略規劃，相當厲害！