《人生馬戲團》資深男星揭「楊思琦鍾嘉欣失蹤之謎」

真相震驚網民 兩女傳遭辣手摧花攝製隊被追斬

TVB劇集《人生馬戲團》於2005年拍攝，2006年播出，劇集由陳浩民、楊思琦、唐文龍、鍾嘉欣、歐錦棠等人主演。不過劇集最為人所知的並非劇本故事或演出，而是拍攝期間劇組在內地廣州市番禺區拍攝時遇襲事件。

有份參演劇集的歐錦棠離巢TVB多年，近日他在個人YTube頻道「乜乜棠水舖」中重提當年事件，還原事件真相。

劇組為楊思琦唱K慶生出事

據當年報導指，《人生馬戲團》女主角鍾嘉欣及楊思琦，在酒家被襲後與同場其他演員及工作人員失散，二人走避到荒郊數小時後自行返回酒店。其後一直有傳，二人遭人綁架數小時且被辣手摧花。

其實其中一位當事人楊思琦在2018年曾經出書談及此事，她指當時他們一行人在廣州拍攝外景，大家晚上到卡拉OK為楊思琦慶祝生日時遇襲，楊思琦形容這是自己最接近死亡的一次。當時有一群惡漢下車拿著開山刀等武器向他們衝過來，鍾嘉欣拉著她逃亡，拖鞋甩掉也不能回頭，她們最後躲在草叢半小時保命。

而鍾嘉欣約4年前亦曾重提此事，鍾嘉欣當時受訪時表示被20名男子追，令她以為必死無疑。她說：「我和她（楊思琦）躲在隱蔽角落，有樹枝包圍才未被發現，那次我以為必死無疑，追我們的是幫派中人，大概把我們誤認作別人，當時我祈禱，我不想死，我還要見我父母，孝順他們。」她指當時瞬間一片安靜，當她張開眼時，追她們的人已經不見，令她更加確信主的存在。

歐錦棠返港避過一劫

網上瘋傳多年指，鍾嘉欣和楊思琦當時被人綁走數小時辣手摧花。近日歐錦棠在個人YT頻道罕有談及此事，他說：「嗰陣時就話要返去內地嗰度拍，喺番禺，有馬戲團㗎嘛，有動物有雜技，我就住咗喺附近，距離個拍攝場地好近，成日都會實景拍攝，有一段時期就留喺嗰度拍攝，有時間我就會返落嚟香港做自己嘢。」亦因為他不時返港及與劇組分開，令他幸運地避過一劫。

歐錦棠稱流氓斬見人就斬

歐錦棠說：「因為我哋多數都係日頭拍，所以夜晚好多時，如果冇外景，啲人就會一齊出去食消夜。大家都會知道，中間有過不愉快事情，劇組畀當地啲流氓斬，唔係一個半個，係一班流氓，據講係兩架車，嚟到佢哋嗰日用膳嗰間酒家，喺二樓，兩架車（啲人）落咗嚟就上去斬人，見人就打見人就斬，當然好多同事爭相走避，奪門而出，撞爛對玻璃門，都有同事受傷。」

他續指：「不過有一樣嘢，好多年喇。依家我就用我所知道嘅講出嚟，當然大家會諗到，兩個女主角，嘉欣同埋思琦，因為啲人四散，啲人追住你斬，真係四散，各有各走。人哋梗係講到好唔好，女仔唔見咗、失蹤咗幾多分鐘，跟住出現返之後冇嘢，懷疑佢哋遭受到一啲，辣手摧花，因為事後我返上去之後都有同個別有啲人傾過，無論喺我個別同佢哋傾，同埋喺新聞報導佢哋講。」

歐錦棠清楚二人藏身地點位置

歐錦棠指，坊間傳聞多年指楊思琦及鍾嘉欣被人辣手摧花，其實並非事實。「兩個女演員走，畀人追，佢哋走咗好遠，因為當地啲街燈唔係咁充足，亦都有啲地方比較村落一啲，荒蕪一啲，呢個我記得係思琦講，畀人追，佢就行到一處有條橋，就跳咗落去，佢見到有啲草叢有啲垃圾就跳落去就匿埋。唔理喇，就拉阿嘉欣匿埋，跟住啲人走過咗，佢哋一路喺度匿咗大概超過半小時，真係肯定冇人回頭，亦冇人行過，佢哋先走出嚟然後返酒店。」他形容當地街道昏暗，兩人安全返酒店後指不知道匿處哪裡。

歐錦棠說：「殊不知呢，我好鍾意獨來獨往，喺上面拍攝嘅時候，我係周不時會鍾意周圍行嚇，我就鍾意行去一距離住宿酒店嗰度，大概都有十幾分鐘嘅路程，如果行路。（嗰度）有個生果檔，我會喺嗰度買啲生果返房自己食，喺得嗰度有生果檔。去生果檔之前，我諗相隔大約十呎左右，一條乾涸咗嘅河流，應該叫河床，因為冇水㗎喇，中間嗰度就有一條，普通，汽車就唔夠，機車、手推車過到去嘅一條橋，嗰條橋都係用水泥鋪，上面好多泥土，睇唔清楚，好舊。」

他續說：「咁嗰個河床乾涸咗，所以生咗好多好高嘅野草出嚟，加上當地人將垃圾掉落去，嗰啲唔係一般垃圾，係大件嘅木板，一塊塊咁掉落去，有時有膠桶啊咁。就係有個咁嘅位，原來我講嗰個地方，好多同事都唔知嗰度有生果賣。呢個之後我就聽咗，思琦佢哋講，話喺個度匿埋，佢話唔知嗰度係咩地方，因為夜晚，後來一路跟住街燈行返酒店，佢一講我就知，就係我話我去買生果必經之處，嗰條橋下面乾涸咗嘅河床。」