泰臣邀劉松仁出山 任舞台劇顧問：想「碌卡」搵佢做旁白

藝人泰臣近日除忙於拍劇外，更擔任天主教聖瑪加利大堂100周年舞台劇《百年人海》導演，除率領一眾「教友」演戲外，亦邀請劉松仁擔任劇組顧問。

泰臣和松哥日前拍攝舞台劇宣傳片，未埋位時已經密密傾劇本，松哥笑指多年來已學懂「抽離」，今次未有趁機發掘「徒弟」：「我做戲做完就係做完，每次跟項目都很大壓力，因為我要思考諗到『頭都爆』，要代入觀眾角度發現問題，同時要諗定點解決！」

松哥表示未曾與泰臣合作，但曾欣賞對方舞台劇，留下深刻印象：「之後睇佢喺TVB做戲，覺得佢好突出，留低好好印象。我唔知佢做導演功力有幾多，但見到佢好投入、好認真，搵佢返嚟，呢個係聖堂福氣。」

泰臣表示喜獲松哥認同，定必使出渾身解數，更自爆想邀對方出山任劇組旁白：「我有問佢啊，但佢冇覆我！不過佢剛剛話『賣關子』先，即係都仲有彎轉﹑有機會嘅！今次素人劇組畀咗我好大驚喜，除咗松哥畀好多意見我哋，仲有唔同界別精英幫忙，發掘唔少寶藏！」