TVB藝人陳詩欣（Eunice）今日（30日）與圈外「學霸」男友陳爾正（Joshua）結婚，兩人今早依足傳統穿上中式禮服，在酒店內進行接新娘、向長輩斟茶等儀式，於儀式前Eunice派利是給「索爆伴娘團」。

當中包括：余香凝、蔡嘉欣、鍾晴等，由於大家感情甚佳，派利是時，眾人都眼濕濕，場面感人！

穿上中式裙褂的新娘子，當然最為漂亮，她手上戴住6對龍鳳鈪，足夠完全遮蓋著她的前臂，行頭十足相當搶鏡！

新郎接新娘後，當然有「例牌菜」在一班兄弟姊妹們起鬨下「錫錫」，大家都玩得相當盡興！

晚上在中環一間酒店筵開酒席，邀240位賓客到場。傍晚時分一對新人及兄弟姊妹團會見記者，見到Eunice身穿淺藍色谷胸大露背拖尾晚裝，化身「Elsa公主」，大曬3吋事業線，又戴上結婚及3卡求婚戒指，亦有閃爆耳環及頸鏈，明艷照人。

記者叫二人錫錫，一開始新娘都有些怕丑，後來他們都大方連咀3次。

講到晚裝，Eunice表示因為之前去睇時裝騷，很喜歡這條裙，加上姪女亦很喜歡Elsa，故就穿了此裙，問到可會在晚宴上唱《Let It Go》？她說：「唔會，唱歌責任留畀蔡嘉欣，佢會唱《老鼠愛大米》，苦練咗好耐。」

她亦謂今次婚禮有Ｗedding Planner幫手，但覺得會有驚喜，問到可有準備甚麼給老公？她說：「冇囉，晏晝我哋喺教堂簽字，我都好驚訝，冇預計過老公會喊，因為佢平時系好堅強嘅人，唔易掉眼淚，估唔到佢講誓詞連鼻涕都掉埋，我都系第一次見，都見到爸爸眼濕濕，見到呢個場面我都有淚奔，一直以為自己唔會喊，因為喺屋企已經實習咗好多次，點知結婚真系好感動，所以喊咗。」

婚後唔介意曬性感

問到老公有何承諾？她說：「老公承諾以後早啲返屋企，因為佢好忙，平時都系一星期先返嚟一次食飯，其餘時間都系我自己一個食，佢都知忽略咗我，希望佢第時多啲陪我。（你結婚後會唔會做少奶奶唔再做嘢？）我同公司仲有好多年約，講笑啫，過兩日要開工拍嘢。」

問到婚後可會減少性感？她說：「我唔介意性感，不過唔知節目仲要唔要我，我已經升咗做人妻。老公都唔介意，佢覺得靚同健康性感OK嘅。」

她謂未有生B計劃，可能幾年後，因想先過二人世界，又希望與姊妹余香凝約定一齊生：「佢生第二胎時我就生第一胎，大家可以一齊大肚一齊入產房生，跟住一齊減肥，余香凝為咗出席我個婚禮仲一直減肥，佢依家仲瘦過我。」

另外，一對新人今午在教堂簽字時，見到Eunice身穿白色低胸魚尾婚紗，講誓詞時見到他們忍不住感動爆喊，伴郎鍾培生亦喊埋一份，場面感人。之後他們接受大家的祝福，並即場錫錫，而拋花球時，好姊妹蔡嘉欣更成功接到花球。

余香凝產後極速收身

姊妹團之一的余香凝（Jennifer）生B後極速收身，爆Fit亮相做姊妹，她亦自豪地表示：「我試呢條姊妹裙嘅時候系未生BB嘅，好多人都質疑我，生咗之後仲著唔著到？今日我著仲覺得有啲松。」

她指自己懷孕重了45磅，現在還差3磅便回復昔日磅數，她說：「生咗BB先5個幾月，都算幾犀利。」