無意要求子承父業做醫生 鍾嘉欣：只想仔女快樂成長

鍾嘉欣相隔多時再拍TVB劇，由少女變身人妻兼兩孩之母的她，在《星空下的仁醫》中展現更成熟的演技，令觀眾眼前一亮。

嘉欣憶起拍攝期間與加拿大家人分隔兩地，即使仔女生病亦無法留在身邊，令她一度情緒低落，演醫生卻不能自醫。雖然丈夫Jeremy是醫生，但嘉欣只想仔女快樂成長，不會要他們子承父業。

鍾嘉欣在《星空下的仁醫》中，與馬國明及鄭嘉穎曾一起實習，後來三人聚首兒科醫院，首集嘉欣完成手術後即說︰「同你哋合作真係好爽呀！」嘉欣受訪時笑稱，其實今次是首度跟馬明及嘉穎合作，無論對自己或觀眾都甚有新鮮感。「我哋三個性格好唔同，佢哋成日講男人嘢，我入唔到話題；但一入片場就撞出火花，其實無特別夾。」

難忘一鏡過急救鏡頭

嘉欣形容，拍攝《星》劇是非一般地困難，但又離奇地順利完成。「疫情關係，原本套劇開唔到，我就直接返加拿大。不過上天真係好眷顧，預計要拍四個月嘅劇，最終兩個月就拍曬，加上遷就小演員開學，好多場景因疫情而拍唔成，其實真係好難，大家都隨機應變。」

嘉欣飾演外科醫生，面對手術戲使用的血淋淋豬器官時毫無懼色，她自言最難忘是在病房為病童急救的戲份，由進入病房開始，到檢查、插喉、插儀器、拆床架等都是一鏡到底拍攝，「我同三位護士一齊試曬位之後，大家手疊手嗌『三、二、一，加油』，好似舞台劇咁。順利完成後，大家一齊拍手，我都好開心，覺得自己做到章以芯一樣咁有型、有能力同咁淡定。」

《星》劇有大量病童個案，嘉欣大讚劇本寫得動人精采。「我做咗媽咪之後，望住所有小朋友都有更深感受。同小演員演戲好開心，我成日想呵護佢哋，我又識得用方法同佢哋溝通相處，等佢哋有安全感就有信心演出。」

拍攝時跟小朋友合作，會否特別挂念身在加拿大的丈夫和一對子女呢？嘉欣稱︰「原本我拍攝一個月後，屋企人會飛嚟香港，床仔整曬，安排好曬，但最終疫情爆發嚟唔到。我當時無後悔接咗劇，但坦白講拍拍下狀態都無咁好，因為好掛住屋企，甚至埋尾日子有少少焦慮，好擔心一對仔女，期間佢哋有兩、三次病咗，但我唔喺佢哋身邊，只能透過視像見面，做媽咪嘅真係好難受。」

嘉欣笑言當時反而鼓勵自己要做得更好，才不會辜負老公和仔女全力支持她的工作。

訓練孩子頭腦創意

嘉欣的丈夫Jeremy是脊醫，將來會否期待仔女成為醫生幫助別人？嘉欣說︰「其實我同我老公無諗過仔女將來做啲咩，我只係想佢哋快樂，做佢哋鍾意嘅嘢。最重要教佢哋要有頭腦、有創意，將上天畀你嘅才能好好發揮，成為專長。我唔會因為老公係醫生或者我係演員，就想佢哋跟住我哋做，只要佢哋鍾意，話畀我哋知，做父母無論如何一定支持。」