星島網：劉家聰腦瘤影響手腳靈活無阻修讀中醫學位 死過翻生想演好戲台慶攞獎

44歲TVB藝員劉家聰參加台慶節目《全城一叮》，分享2017年尾切除6CM大腦腫瘤後，曾半身癱瘓的親身經歷，嘉賓評判馮盈盈亦被感動到狂喊。面對大病，家聰並冇自怨自艾，反而抱積極態度面對人生，他笑住說：「系畀機會我放下做個平凡人。」

自此家聰性格亦改變，學識放慢腳步好好享受，以往工作時最常見的忟憎亦消失。他最想用豐富的人生經歷，發揮於演技上，引起共鳴，將來有機會在台慶獲得獎項。

採訪：方騫平攝影：羅安強場地：三軍會

「生命鬥士」劉家聰相約《頭條日報》記者到他的「第二個家」做訪問，原來術後他經常到該會所游水、溫書、甚至睇風景，過住平凡人生活。

家聰透露每年的覆診報告，醫生都以「靚仔」形容，算系叫大病痊癒，但因為腫瘤位置影響到行動區，目前行路都會拐嚇拐嚇，手部活動亦冇正常人咁靈活，所以《全城一叮》中表演手影及沙畫，要花足兩星期日以繼夜練習。

大手術後個人平和曬

唔煙唔酒熱愛做運動的家聰，2017年尾任職有線電視娛樂新聞台主播，由於每日返工愈嚟愈攰，加上腳力變差，行得好辛苦，諱疾忌醫一排終於面對現實睇醫生：「感恩醫生用溫和態度講解病情，所以畀信心渠醫我，安排喺10日後開刀，仲記得醫生叫我乜都唔使準備，惟一術前要食好啲，我仲食埋個自助餐先入院。」

直至做完7個小時大手術清醒過後，家聰有重生感覺：「我喺病床上第一個五感系『點解世界唔同咗？點解突然咁平靜，啲嘢咁慢？多咗咁多色彩慨？』原來系畀機會我放慢腳步，睇嘢細緻咗系開心㗎，可以享受過程，細味每一樣嘢，亦冇咗以前做採訪時慨忟憎。」

當時家聰相信靠意志一定行得返：「其實要多謝TVB，做藝人冬天跳海，夏天拍古裝，瞓埋棺材，我哋乜都挨過，就算冇錢開飯都挨到，只要放下，面對就可以。」

最後家聰唔想半夜驚動家人照顧他去廁所，一個月後迫到自己企返起身行路：「家我都唔擔心雙腳會唔會再有好轉，因為呢個只系皮囊，最重要系內在。」

經歷豐富變「老火湯」

因為多咗好多人生經歷，家聰形容自己變成「老火湯」，內里有最濃縮湯料，個人愈來愈成熟：「男人系要有經歷先可以成長，家我乜嘢都可以演到，唔系得個空殼，所以要爭取自己慨舞台，希望觀眾可以感受得到我慨故事，從而引起共鳴。我慨人生目標除咗培育囡囡做有智慧慨人外，仲好恨攞到台慶獎項，但求有獎，乜獎都得，新人獎都得…」

至於經濟狀況，雖然要供樓，但家聰用OK嚟形容：「我好細個就努力尋找工作機會，唔會令自己咁坎坷，都要畀掌聲自己。」

目前家聰仲讀緊港大6年制中醫學位，除咗尋求更多知識，最想學以致用，固本培元。