陳安立林希靈行婚禮揚言努力造人恨生孖胎

藝人陳安立與林希靈年初宣布婚訊，今早（24日）假深灣在一眾親友及牧師見證下，正式拉埋天窗，禮成後筵開20圍與大家分享喜悅。

一對新人邀得許家傑、羅天宇、周志文及周志康等擔任戥穿石，鄺潔楹則出任姊妹團，一眾圈中好友包括陳庭欣、洪永城、劉佩玥及「肥仔」梁業等紛現身送祝福，場面相當感人。

一對新人全程表現輕鬆，更應記者要求「巴黎鐵塔反轉再反轉」咀嘴。談到造人問題，他們更打趣說：「今晚冇After Party，要努力嘞，七師傅（七仙羽）話床位要向北，跟住攞我哋朋友嗰支話可以決定生女或生仔嘅潤滑劑出嚟。（好急？）順其自然啦，其實都想過少少二人世界，但如果『有禮物』都開心嘅。」

陳安立更坦言想生孖胎，當問到想生幾多個時，林希靈說：「我哥哥生咗3個，佢完成咗歷史性任務，我就想生女，不過啲契爺全部都咁靚仔，我驚佢大個咗嫁唔出！」

她又指老公下月將要拍劇，預算5月才拍：「所以我都約咗啲好姐妹，去展開我獨自嘅Honey Moon，同埋我發現啲戥穿石好多都仲系單身，所以婚宴安排咗吐女仔包圍住佢哋，認真為佢哋嘅姻緣著想，昨晚我排座位表排到好夜㗎。」

談到婚禮上未有落淚，他們笑言：「都有開心嘅眼淚嘅，好難得咁多朋友聚埋一齊，覺得比較似Christmas Party。」陳安立更打趣說：「啲賓客好早身，十點半準時現身觀禮，頭先聚集咗百幾人，我自己做禮婚MC都未見過咁墟冚。」

林希露則自爆戴戒指及斟茶環節都有甩漏：「冇辦法，我哋輸經驗，哈哈！（行禮時牧師講咗45分鐘？）最記得系佢話老公要聽老婆話，要為太太感到高興。」陳安立接口放閃：「平日我見到妳開心，我都會開心。今日難得3個電視台朋友都嚟咗，婚宴上交由練美娟主持個啤酒競飲大賽，等大家高興。」

周志文合照怕丑硬曬軚劉佩玥公開關係：我哋系…

藝人劉佩玥（Moon）與周志文的戀情傳足多時，二人卻沒有正式承認。今早（24日）周志文為好兄弟陳安立婚禮擔任戥穿石，「家屬」Moon亦有現身婚宴，被記者逮過正著，二人終大方合照及孖住受訪，但志文全程表示怕丑兼「硬曬軚」，相當搞笑。

Moon自爆：「陳安立系我中學師兄，識咗好耐，冇諗過入行識埋佢嘅另一半，真系好開心。（今日嚟取經？）戥人開心啫。今日做咗人情，禮物後補。（今日冇After Party，你哋兩個陣間有咩平安夜節目？）我要為即將開拍新劇去改造型，今晚會約屋企人食飯。」志文則接口：「睇嚇等陣班兄弟有咩活動囉。（唔約Moon？）佢做嘢嘛。」

記者追問何時才公開關係，Moon笑言：「咪公開咗我哋系好朋友囉。（志文好緊張喎。）佢今朝好早起身啫，做兄弟唔通好似我依家先嚟咩？」她笑言：「我哋一路都幾好，好朋友嘛！」

當談到「進一步」時，志文說：「我諗每一日都進步。（女仔咁大方，幾時畀名分佢？）要咩名分？好突然。年紀大咗隨緣，唔需要諗咁多，交畀個天安排，我自己希望開心嘢可以快啲嚟。（買咗聖誕禮物交換未？）平日大家都會買禮物，喺派對上整蠱人，令對方又驚又喜。」

記者提議「買戒指」，Moon即舉起雙手大叫：「唔使嘞，好多呀。」