《拳王》张振朗谂过做业余拳手一个原因却步
TVB小生张振朗为无线台庆剧《拳王》丧操变“肌”佬,为准备泰拳拳手呢个角色,事前佢狂睇拳赛片做功课,务求令自己有真实感。问到佢最叻出边招?佢抵死笑话最叻中拳:“我嗰个角色系一个忍耐力好强慨人,虽然系会打番人,但个比例系七三,七系中拳、三系出拳!我成日都畀人打到瞓低!拍呢一套剧食慨拳系我呢三世加埋慨拳,根本未试过畀人打!未试过但觉得好好玩。”
拳脚冇眼,问到拍摄期间有误中对手拳而受伤?有“地狱黑仔王”之称慨佢笑话今次行运,少少瘀系好正常,最重要系保得住块面:“有拳套畀我哋去挡,但系脚就好得意,泰拳系拳脚踭膝,有阵时系用上五吋下五吋去挡,就未必系每一个对手都可以好清晰、用啱力去到嗰个位,我试过有一啲对手,系唔识就力,真系硬生生咁样踢落嚟!”
续生动描述有次全日拍摄,第一场、第一Take就“中招”:“第一吓用脚去挡慨时候,咦?哗!点解会咁慨?跟住,OK!冇办法,都要继续去,点解咁痛慨?唔理啦!我就送番一嘢畀佢!现场有好多演员都系做观众,佢哋就话呢一场打得好真,哈哈!”
另外,振朗仲话有次拳赛系同真正拳手比试,上台嗰刻怯到爆,形容对手个样真系好似想杀咗人咁:“嗰场戏系讲佢一拳打落嚟,我冇嘢望番佢,唔知系咪佢哋惯咗嗰个力,以为我有个拳手身形顶得顺, Action嗰阵时佢一拳打埋嚟,入咗!跟住我谂住做埋个反应望一望,唔得!即刻瞓咗系地下度,嗰一拳我谂佢已经留咗力㗎啦,只不过喺佢心目中嗰个力度可能得5成,但系我哋呢啲普通人就有成7、8成,我好记得呢一吓,希望可以剪番呢啲NG片出嚟,真系几好笑!”
虽然频频食拳,但佢话拍完都真系谂过参加业余拳赛:“行动前谂深一层,都系靠个样揾食慨,冇啦啦打瘀咗第二日返工就唔系咁好啦,不过真系会有咁慨谂法,几得意慨!”
今次饰演拳手令振朗有一大突破,佢话之后想试多啲唔同角色,更渴望做“爸爸”:“尽量唔好畀我成日做埋同一样慨嘢,譬如今次由好瘦变好大只,系一个突破,下次可唔可以做一个打拳慨肥佬,甚至凑吓仔我都OK。(演过爸爸未?)未演过!仲要系未婚爸爸嗰只,当系大学毕业嗰啲,凑一个六、七岁慨仔慨时候点样去面对,或者试吓做反派杀人犯,基本上我真系未做过反派,只系做过好多次蛊惑仔。”
《青春本我》收14.6点《拳王》赢口碑输收视
上周收视出炉,每年一度的大型筹款节目《欢乐满东华2021》与声梦学员主演的歌舞剧《青春本我》同样录得14.6点收视。
至于处境剧《爱.回家之开心速递》成绩稳定,有21.4点收视,而台庆剧《拳王》虽然口碑不俗,然而成绩却不似预期比之前轻微下跌,只有15.7点收视,看来要加把劲。