林敏驄江美儀羅毓儀祝人人有得撈

《下流》成大贏家「車家」食開年飯慶功

今年TVB台慶獎項塵埃落定，「視帝」、「視後」落喺陳山聰及江美儀手上。首拍劇集的林敏驄(大師)，亦被網民封為「民選視帝」贏盡口碑。新正頭「車總」林敏驄率「車太」江美儀及細女「蔓蔓」羅毓儀豪食開年飯慶功。

男方接受《頭條日報》訪問時就笑言一早攞咗「獎金」(優厚酬勞)，更抵死自爆酬勞較易角前的姜皓文還要多。採訪：方騫平攝影：譚志光場地：中華小館

去年TVB劇集《下流上車族》叫好叫座，成為台慶頒獎禮大贏家，更以大熱姿態擸埋「最佳劇集」大獎。

林敏驄、江美儀及羅毓儀於開年飯局中勁好胃口，開心大啖食「鳳凰展翅」(炸小黃魚)、「年年有餘」(鎮南非鮑魚) 、「包你撈起」(豬筋撈粗面)及冰鎮咕嚕肉等，笑言大女「芊芊」郭柏妍要開工，要食埋渠嗰份。

「撈起」時3人大講吉利說話，林敏驄邊落鮑魚汁邊說：「呢個系Easy執！」江美儀及羅毓儀你一句我一句開心說：「個個有得撈，仲要系撈粗，(落花椒油)有好多油水，搵千千萬萬億億然後上車喇…。」

美儀同前夫互相關心

江美儀等咗31年終奪視後，老友梁洛施、前夫吳君祥分別發短訊祝賀，美儀承認跟前夫仍保持良好關係，會互相關心。

問到有否復合機會？美儀即笑住落閘：「唔好喇啩！畀啲真嘢我嗒嚇好唔好？」羅毓儀話「媽咪」行緊正官運，有獎有事業就有老公。江美儀坦言有個伴都好，開心就得，一切隨緣：「不過，我同林敏驄八字系好相似，會互相助攻！」

林敏驄表示同意：「渠開工第2日拍感情戲就助攻我，所以要投桃報李，家渠由『助攻王』變『烏雞視後』。」

最想《下流》拍電影版

林敏驄邊食邊爆料：「所以我當日同渠(美儀)講，話『視後一定系你』，但佢唔信！」問到大師系咪早已收到風？他哈哈大笑推說：「因為有人報夢畀我知。」

大師再得戚搞爛gag取笑江美儀：「渠拍劇前又緊張，頒獎禮前仲騰雞到去藥房買視後(事後)丸，話對手好勁，食偉哥㗎，要頂住！」大師又再爆多啲：「今次系老竇賺錢老婆同女享福，我系總經理(曾志偉)輩負責派獎，幫渠哋打江山，哈…我連民選視帝都唔要喇，因為攞咗個終極大獎，喺台上俾團隊圍住經已好滿足，連監製都要彈埋一邊。」

他又指自己已攞咗『獎金』：「『獎金』唔系差電影好多，志偉仲話我比黑仔(姜皓文)多，我睇錢份上啫。」美儀和應說：「渠攞曬啲『獎金』，所以視『獎品』如浮雲，『獎品』系好虛啫。」

而羅毓儀最想由「爹哋」執導拍《下流》電影版《如珠如寶千千萬萬》，美儀建議叫《車家大戰哈比族》都唔錯。另外，林敏驄將於3月舉行作品展演唱會，「車家」到時會於台上合體一齊唱歌。