陳家樂連詩雅4.24結婚 婚照曝光 重拾初次約會回憶

陳家樂去年6月向女友連詩雅（Shiga）求婚成功，今天（6日）一對準新人懷著幸福愉快心情，正式對外宣布婚期定4月24日，兩人正式結為夫婦，並發放3張溫馨甜蜜婚紗照，分享喜悅。

婚期定於4月24日，是聽從家中長輩安排，並特意找師傅擇良辰吉日舉辦婚禮。為留下美好回憶，家樂和Shiga分別在香港和日本，選了幾個地方拍婚照。家樂說：「結婚相有幾個地點，其中一個是我們剛剛開始拍拖，曾經去過的沙灘，對我們來說有紀念意義，所以再次踏足這沙灘睇日落、數星星，重溫當時的浪漫。」

3張發放的婚紗照中，戴上婚戒的兩人，輕撫面龐、鼻尖相碰、輕吻玉手，每一個甫士和表情，也難掩溫馨愛意，Shiga左手無名指上的閃爍鑽戒，相當搶眼。

提到今次操刀影婚照的合作單位來頭不少，皆因整個團體，都是各自陪家樂和Shiga成長的多年好友。家樂說：「攝影師是我的同學，而造型則是Shiga的好姊妹，整個化妝、髮型團隊足足有20多人，陣容強大。」

由人生早期階段，直到見證好友踏入婚嫁禮堂，同樣也引證友誼永固，讓兩人份外感恩：「整個拍攝團隊超級幫忙，加上全部都是好朋友，氣氛相當之好，拍攝婚照當日，更有種預演婚禮感覺，內心好感動。」

陳家樂讚未婚妻好叻「一個頂十個」 Shiga稱籌備婚禮唔簡單

陳家樂和連詩雅（Shiga）將於4月24日結婚，2人今天（6日）發布婚照，一對準新人各自在社交網貼相，並分享快將結婚的喜悅，陳家樂寫道：「呢幾個月差唔多日日比人問幾時擺酒，問到我鬼咁尷尬，因為我同未婚妻都希望可以準備好曬，影曬婚紗相，有張靚靚邀請卡，先正式公布。

但偏偏呢幾個月又好忙，想放一日假都好難，成個婚禮嘅準備過程，基本上都冇辦法落手落腳去處理，好在未來陳太真係好叻，一個頂十個，好似打多份工咁，將所有事攬曬上身做，大如酒席﹑過大禮，細如老爺奶奶著咩衫都搞得掂，唯獨婚紗相真係要等我先影到，所以公布嘅日子一拖再拖。

好開心今日終於可以同大家正式宣布﹗2023年4月24日係我哋嘅大日子！好朋友們！炸彈陸續送到！#未來陳太真係好叻 #係朋友要請定假」。

Shiga則寫道：「知道一直以來大家都好關心我哋嘅大日子，原來要籌備一個婚禮，真係一啲都唔簡單，所以想將事情安排得好一點，才公布日子，終於等到陳生，完成手頭上嘅工作，可以拍婚照，然後有張好好睇睇嘅照片一次過公布消息。

好開心，今日終於可以同大家正式宣布呢個喜悅，2023年4月24就係我哋Big Day啦﹗期待嗰日見到我哋親朋戚友朋友們，見證我哋重要既時刻，到時見！#要找到個喜歡陪我數星星睇動漫嘅人唔容易但係我找到啦 #陳生辛苦啦」﹗