鄭欣宜紅館開騷跟鄭裕玲咀嘴 被Do姐追問戀事認「拍拖」

鄭欣宜（Joyce）一連三場「Believe Us 鄭欣宜演唱會2023」，昨晚（16日）在紅館開鑼，全場爆滿，好友李幸倪（Gin Lee）和應智越（細貓）捧場，特別嘉賓鄭裕玲（Do姐），她上台與Joyce玩「大問答」互揭感情秘密，妙問妙答。

昨晚Joyce以《Glitterfalls》和《@princejoyce》，與20位舞蹈員勁歌熱舞，為演唱會掀序幕，然後唱《小夜燈》時全場觀眾亮起手機燈，一片星海中，非常壯觀。接著Joyce演唱《你是什麽時候開始不愛我的？》和《恐懼蠶食心靈》時，一對男女舞者在台上洒水的裝置中跳舞，演一對吵架情侶，全身濕透。

之後Joyce介紹嘉賓Do姐出場時，全場歡呼，她們向四面台觀眾打招呼，Do姐說：「我好開心你請我嚟做嘉賓，我都覺得我非常有資格，因為喺你未出世，肥姐（沉殿霞）大肚嘅時候，我已經知道你嘅存在，睇住你長大。不過，演唱會嘉賓要唱歌喎！」

Joyce笑說：「唱歌跳舞呢啲粗重嘢交畀我做，其實我請你嚟做嘉賓另有目的，我想請你咁有份量嘅嘉賓上嚟講下我，教訓下我！」Do姐想了一會再說：「我又無察覺你有乜唔好，不過我收到風，你鍾意夜瞓又好晏起身，你要學下Do姐早睡早起，呢個歲數都Keep得唔錯！」全場觀眾拍掌。

Do姐續說：「憑良心講，欣宜無嘢唔好，睇佢長大，佢好尊重自己嘅體態，佢做番自己，我好開心，佢對於鍾意嘅事，即係唱歌演出，會付出100%，叻女到喺紅館開演唱會，唔止一次，係兩次⋯⋯（Joyce在旁更正『係第三次』）3次添！我引以為傲。」

Do姐表示自己不會表演唱歌，建議與Joyce台上玩「大問答」，隨即問Joyce揀愛情還是事業？Joyce表示兩樣都要。她反問Do姐揀電視台定電台，Do姐亦稱兩樣都要，Joyce追問哪一樣掙錢更多？Do姐說：「家本人做嘢係為興趣，最緊要我開心！」全場觀眾再度掌聲。

Joyce續問：「TVB定ViuTV？」觀眾立即起鬨，Do姐說：「梗係『開電視』啦！我就嚟要拍旅遊節目！」Do姐問欣宜擇偶條件，Joyce表示會揀較高大和肥肥哋男仔。Joyce問：「如果得個一水泡，你救Jackson Wang（王嘉爾）定姜B（姜濤）？」Do姐說：「最近多咗個任時完，不過佢哋識游水，唔使我擔心。（點解Ig淨係follow佢哋唔follow我？）時機未成熟。」

Do姐接著反擊：「你到底有無拍拖？」Joyce反問她，Do姐巧妙地說：「我有拍拖，我同現場咁多人拍拖，我覺得呢種拍拖關係最好，佢哋鍾意我，我又鍾意佢哋，我哋又唔會嗌交！咁你有無拍拖？」Joyce照辦煮碗回答，全場爆笑。最後Do姐祝福Joyce繼續努力，舉行更多成功的演唱會，然後二人咀嘴擁抱。

演唱會原定以Joyce金曲《女神》作結，但她落台後觀眾不肯離場，不斷大叫Encore，她換上便服牛仔褲再度出場，與觀眾一齊做心心手勢影大合照，並多唱一首《半份關心》。

另外，今次演唱會舞台設計非常特別和揼本，除了在舞台四邊舖上泥土，呼應演唱會海報設計，還專程從英國訂製Ground Support，在場內加設四條直柱，配合電腦程式和射燈，炮製不一樣的燈光效果，無論Joyce勁歌熱舞，還是演繹抒情慢歌，燈光從四方八面全場投射，層次更豐富。

而每支燈柱後拉起今次演唱會主題「Believe Us」美術字圖案的橫額，令整個演唱會設計由舞台伸延至全場，讓觀眾更融入氣氛。

Joyce說：「與上次『Between Us演唱會』相隔九個月，今次可算係2.0版本，所以我決定不惜工本去做今次演唱會。大家見到四邊有四條柱，叫做Ground Support，來自英國。所以要同佢哋講聲『Hello darling, welcome to Hong Kong. 』

好多外國演唱會都有，所以我哋今次好威威架，好國際，好international。因為有呢個Ground Support ，先至有好靚嘅檯燈效果，希望大家好好欣賞。」