繼續寵愛‧二十年‧音樂會丨

唐唐壓軸獻聲感謝哥迷從未遺忘 郭富城榮幸曾為張國榮伴舞

張國榮《繼續寵愛．二十年．音樂會》昨晚於紅館舉行，演唱會尾段，陳潔靈與張國榮隔空合唱《誰令你心痴》，古巨基則演唱《Dear Leslie》及《風繼續吹》向張國榮致敬。

演唱會最後郭富城驚喜現身，從舞台下升起又唱又跳《Monica》，重現經典舞步，更有逾20名舞蹈員伴舞，現場隨即high爆，觀眾紛紛站起跟著一起跳兼報以尖叫聲。

郭富城唱畢《Monica》後，指著天及向天送上飛吻，接著他說：「今晚係一個好特別嘅日子，20年，哥哥一直喺我哋嘅心入面，一直都喺度。我記得我入行第一個騷，係1986年嘅《星光熠熠耀保良》，我好有幸同佢表演，不過嗰陣做dancer，好榮幸好開心曾經為佢伴舞。

我仲記得佢仲請我哋食飯，對dancers好好。其後我做咗歌手，一直都覺得佢先係真正嘅舞台王者，冇人代替到。佢成笑住對dacners講：『畀心機，畀心機！』我真係有畀心機㗎。雖然過咗咁多年，相信全球歌迷都好錫Leslie。」

接著郭富城演唱張國榮第一首金曲金獎歌曲《有誰共鳴》，唱到一半郭富城說：『我好記得哥哥攞第一首金曲時，唱呢歌時話：『我唱呢隻哥唱到眼濕濕，以後我唱呢首歌都要笑住唱。』」然後著觀眾一齊拍手，場面感人。

音樂會完結前，現場螢幕放出哥哥與摯愛唐鶴德的合照，唐唐錄音獻聲悼念哥哥：「古人有一句說話係咁樣講：『死而不亡者壽』，原來死亡並唔係一個終結。被遺忘嘅，先至係。好幸運，哥哥喺佢呢20幾年嘅演藝生涯裡面，佢演過好多令人印象深刻嘅角色；唱過好多動人心弦嘅歌曲；亦都留底咗好多姣、靚、型、寸嘅舞台表演，呢啲都成為咗我哋嘅集體回憶。

更幸運嘅係，哥哥有一班一直以嚟都咁愛佢、咁錫佢、咁掛住佢嘅好朋友、哥迷同影迷。我喺呢度代表哥哥衷心咁多謝大家。今日係一個特別嘅日子。

我哋就襯住今晚呢個機會，一齊回憶哥哥嘅過去、回憶佢嘅真、善、美，延續對哥哥嘅愛同思念。繼續寵愛，張國榮。」

郭富城在接受訪問時，直言跟哥哥有很多難忘回憶：「我啱啱出道，哥哥已經係天王巨星，對我嚟講係一個好遙遠嘅事，但Leslie對人毫無架子，好錫dancers，所以你見我而家都好錫Dancers，我覺得呢種就係傳承精神。」郭富城透露因覺得《Monica》和《有誰共鳴》很有意義，所以自己特別揀選這兩首歌來唱，希望用這兩首歌去懷念對方。

而早前在美加舉行巡迴演唱會時，郭富城亦有在當地宣傳新戲《斷網》及《風再起時》，以及參與當地電影展並且得獎。郭富城表示最初也擔心趕不及回港，但幸而經安排後亦能順利參與今次演出，他指現時最大問題就是時差，每天早上8、9點才能入睡，相信要過一、兩星期才可以調整睡眠時間。

至於如何慶祝得獎？他說：「其實係一種鼓勵，攞完就放低，繼續做想做嘅工作，舞台係我最熱愛，又可以唱歌又可以跳舞、同啲fans互動，好開心。」郭富城亦預告今年會專注演唱會及音樂上的工作，至於電影則隨緣。