胡美貽贊洪永城口才了得　倪嘉雯拍旅遊節目爆喊

倪嘉雯（Carmen）與胡美貽（Nicole）今晚（14日）為無綫遊戲節目《思家大戰》錄影，Carmen表示今次是首度參加《思家大戰》，直言非常期待：「我集集都有睇，每條問題都答到，我同阿媽講我去玩一定贏到好多錢。」

至於第二次玩的Nicole就指並非想像中容易，上次最後變零分，問她今次是否來復仇？她說：「我哋要靠Tony（洪永城），佢要醒啲。（你同佢一齊去亞馬遜拍節目，佢醒唔醒？）佢幽默多啲，我哋都系搞笑底，不過佢今日個外觀比喺亞馬遜時好好多，佢之前畀人感覺好唔整潔。

（佢有冇傳授啲主持功力畀你？）我頭幾日食得好飽，佢字字中Point，好容易畀觀眾感受到個氛圍，我依家講嘢都字字有力咗。」

問她有否以泳衣上陣？她笑言原本想跳河，但被大家阻止：「因為我唔識游水，而且佢哋話有人跳完隻眼盲咗，所以都幾危險，不過Tony就真系跳咗。」她稱自己雖然無跳河，但有徒手爬40米高的樹，戲言下次可挑戰爬IFC。

而Carmen就到了吉隆坡拍旅遊節目，她稱拍到最後一日時，跟導演講感受講到喊：「今次去咗兩星期，大家之前原本唔識，好難搵到一班人咁夾，好似同朋友去旅行咁。今次系我第一次拍旅遊節目同去吉隆坡，系拍攝時間長啲，但唔算好辛苦。（有冇著泳裝上陣？）我都唔系呢個路線，但因為天氣太熱，所以都有著背心短褲。」

洪永城做女兒奴勁錫囡囡　意外捧紅小Edan搞笑要中介費　

藝人洪永城（Tony）今晚（14日）擔任TVB遊戲節目《思家大戰》嘉賓，提到他主持的節目《成人教科書》捧紅了小Edan（蔡施齊），他笑言：「佢依家有廣告拍，我呢個主持人都冇，平時大家會笑佢好似Edan，但我都冇諗過佢會咁紅，我應該要問佢媽咪攞番中介費，因為系個廣告商問我攞小Edan媽咪聯絡方式，我問准咗佢媽咪先畀，我呢個中介人分番兩成都差唔多。」

他指香港的小朋友經理人公司不多，自己可以開公司分一杯羹，問他是否想簽小Edan？他開玩笑說：「系，傾緊，簽佢20年，我講笑咋！」

講到Tony可簽自己的女兒，他稱要簽一世，後來正經道：「唔想佢過多曝光，每個人嘅取向都唔同，費事佢太過招搖，系有廣告商接觸過我，咁其實對個小朋友冇影響，系對我金錢上有影響。

但我自己有吖嘛，所以錢唔系主要因素，最緊要系合適同開心。總之唔想佢過度曝光，暫時都系喺我哋自己社交網開心分享，因為一講到商業就變曬意義。」

另外，問到《成》會否開拍第二輯？他坦言不知道，但認為能開第二輯當然好：「如果開新一輯，都唔知用番原本嗰啲定系再揀新，揀小朋友都花咗三、四個月，系好難揀，依家揀出嚟嘅都系精英中嘅精英。」

而他最近又跟J2的一班靚女藝人主持旅遊節目，眾靚女被笑指是Tony's Angels，他透露有跟胡美貽一齊到巴西拍旅遊節目，笑言也是時候要將主持心得承傳給新一代。