42岁龙婷认单身唔会拣圈中人拍拖！被评以邓丽君腔走天下高EQ回应

42岁有“小龙女”之称的龙婷，成功由旺角行人专用区唱到《中年好声音》，虽只能夺梗颈四，但获得“观众最爱好声音”奖，有观众缘更珍贵。龙婷坦认参赛只想提高知名度，所以今次绝对赚突。讲到跟参赛者丁文俊传绯闻，龙婷笑言只为收视率交戏，又首度公开感情状况及择偶条件。

另外，她又承认正跟TVB倾合约，希望有机会唱剧集主题曲及拍剧。

采访：杜杜 摄影：Stanley

龙婷总结参加《中年》经历，最初只为跳出旺角提高知名度，“谂住喺电视曝吓光，等睇TVB慨朋友认识吓我，呢个节目好多人睇，佢哋见到呢个女仔熟口熟面，又知道我之前做过慨嘢，我冇因为疫情冇表演放弃自己梦想。”

得民心重要过攞三甲

赛前大热的龙婷，最终三甲不入，不少观众戥她不值，“造马”之声不绝，当事人就认为绝无内定，更认为得民心更紧要，“自己尽咗力，唱完《疯了》算系满意表现，比赛梗有高有低，其实我有最受欢迎歌手奖好开心，得到民心系投票出嚟。”

向来擅唱邓丽君及王菲歌曲的龙婷，对于被评“唱咩歌都系邓丽君腔”，她就没好气道：“两个都系天后有咩唔好呀！？邓丽君你已经听唔到，我把声有少少似佢，有时唱返佢啲歌有咩唔好，我觉得好事嚟，话我似两个不同时代最好慨天后，我觉得系赞我。”

讲到唱任何歌都用同一唱腔，她就强调有以歌曲本身风格来演绎，“真系好摇滚咪好摇滚咁唱，做返嗰只歌原本慨情感。”

为收视交戏搞绯闻

讲到参加《中年》得着多，龙婷就笑言不包括跟参赛者丁文俊传绯闻，“大家熟咗一齐食吓饭倾吓偈，觉得佢个人都几好，但比赛完咗个绯闻都完咗，以前为咗收视率呃你哋写啲嘢！哈哈！配合吓啰！其实我哋冇嘢㗎！（交戏畀我哋？）我哋系艺人娱乐大家，你哋钟意点样娱乐，我哋咪配合返，完咗骚你哋都可以继续写绯闻，睇吓你哋揾唔揾到。”

谈到真实感情状况，龙婷起初唔想讲，“私人生活就简简单单冇乜嘢，做嘢慨成就感较感情靠得住。”再追问就坦认单身，“家真系冇㖞点样认呀！我比较主观啲，系好难揾。”

讲到理想型，她最初搞笑话：“我钟意刘德华，四大天王都钟意，最紧要佢叻过我，我可以依靠。”之后她才认真答：“唔会揾呢行慨人，绝对唔会，唔会揾男歌手，因为我好了解自己情绪，自己都搞唔掂自己，唔想揾同行，做我哋呢行慨人自信心要把握得好，但生活中唔可以太自我，要低调啲，呢样嘢好似比较难把握啰！”

她亦强调不需要靓仔同小鲜肉，“有才华紧要啲，畀我觉得佢系为我好、好锡我，年纪大啲经验同能力会强啲，最起码有问题时可以分享吓意见。”

不过42岁的她未心急拍拖，“25岁后就心急慨，家唔急啦！”

不谈感情，只想努力工作的龙婷，正在跟TVB倾合约，对未来有很多目标想完成，“我喺屋企日日都睇TVB，好多筹款节目都想参与吓，帮啲需要慨人，又希望有机会可以唱吓主题曲，知道好多人都想唱，所以要慢慢等啰！另外，演戏啰！如果觉得我可以栽培，我都愿意吃苦。”