42歲有「小龍女」之稱的龍婷，成功由旺角行人專用區唱到《中年好聲音》，雖只能奪梗頸四，但獲得「觀眾最愛好聲音」獎，有觀眾緣更珍貴。龍婷坦認參賽只想提高知名度，所以今次絕對賺突。講到跟參賽者丁文俊傳緋聞，龍婷笑言只為收視率交戲，又首度公開感情狀況及擇偶條件。

另外，她又承認正跟TVB傾合約，希望有機會唱劇集主題曲及拍劇。

採訪：杜杜 攝影：Stanley

龍婷總結參加《中年》經歷，最初只為跳出旺角提高知名度，「諗住喺電視曝嚇光，等睇TVB嘅朋友認識嚇我，呢個節目好多人睇，佢哋見到呢個女仔熟口熟面，又知道我之前做過嘅嘢，我冇因為疫情冇表演放棄自己夢想。」

得民心重要過攞三甲

賽前大熱的龍婷，最終三甲不入，不少觀眾戥她不值，「造馬」之聲不絕，當事人就認為絕無內定，更認為得民心更緊要，「自己盡咗力，唱完《瘋了》算係滿意表現，比賽梗有高有低，其實我有最受歡迎歌手獎好開心，得到民心係投票出嚟。」

向來擅唱鄧麗君及王菲歌曲的龍婷，對於被評「唱咩歌都係鄧麗君腔」，她就沒好氣道：「兩個都係天后有咩唔好呀！？鄧麗君你已經聽唔到，我把聲有少少似佢，有時唱返佢啲歌有咩唔好，我覺得好事嚟，話我似兩個不同時代最好嘅天后，我覺得係讚我。」

講到唱任何歌都用同一唱腔，她就強調有以歌曲本身風格來演繹，「真係好搖滾咪好搖滾咁唱，做返嗰隻歌原本嘅情感。」

為收視交戲搞緋聞

講到參加《中年》得著多，龍婷就笑言不包括跟參賽者丁文俊傳緋聞，「大家熟咗一齊食嚇飯傾嚇偈，覺得佢個人都幾好，但比賽完咗個緋聞都完咗，以前為咗收視率呃你哋寫啲嘢！哈哈！配合嚇囉！其實我哋冇嘢㗎！（交戲畀我哋？）我哋係藝人娛樂大家，你哋鍾意點樣娛樂，我哋咪配合返，完咗騷你哋都可以繼續寫緋聞，睇嚇你哋搵唔搵到。」

談到真實感情狀況，龍婷起初唔想講，「私人生活就簡簡單單冇乜嘢，做嘢嘅成就感較感情靠得住。」再追問就坦認單身，「家真係冇喎點樣認呀！我比較主觀啲，係好難搵。」

講到理想型，她最初搞笑話：「我鍾意劉德華，四大天王都鍾意，最緊要佢叻過我，我可以依靠。」之後她才認真答：「唔會搵呢行嘅人，絕對唔會，唔會搵男歌手，因為我好了解自己情緒，自己都搞唔掂自己，唔想搵同行，做我哋呢行嘅人自信心要把握得好，但生活中唔可以太自我，要低調啲，呢樣嘢好似比較難把握囉！」

她亦強調不需要靚仔同小鮮肉，「有才華緊要啲，畀我覺得佢係為我好、好錫我，年紀大啲經驗同能力會強啲，最起碼有問題時可以分享嚇意見。」

不過42歲的她未心急拍拖，「25歲後就心急嘅，家唔急啦！」

不談感情，只想努力工作的龍婷，正在跟TVB傾合約，對未來有很多目標想完成，「我喺屋企日日都睇TVB，好多籌款節目都想參與嚇，幫啲需要嘅人，又希望有機會可以唱嚇主題曲，知道好多人都想唱，所以要慢慢等囉！另外，演戲囉！如果覺得我可以栽培，我都願意吃苦。」