新聞女王｜佘詩曼否認氣場勁嚇壞後輩 讚王敏奕做足功課

佘詩曼（阿佘）、馬國明、李施嬅、何依婷、王敏奕等，今日在邵氏影城拍攝無綫新劇《新聞女王》。相隔多年重返娘家拍劇，阿佘對劇本和導演拍攝手法充滿信心，指各人也用心演好角色，相信完成品會令人滿意。

談到休息時間可足夠，她說：「一時時，如場戲好緊要都會長時間捱嚇。監製鍾澍佳會儘量惜住演員，對女仔會好啲，因為話拍出嚟女仔唔靚冇著數。馬國明可能慘少少，唔緊要，佢天生麗質。（你氣場勁，有冇嚇怕新晉演員？）邊有呀！開頭可能大家唔太熟絡，依家再問佢哋應該冇。」

阿佘在劇中飾演新聞主播，她指角色有很多專業對白，而且要講得順暢，演出時很有難度。她說︰「有時都幾難講，唔使埋位時就靠背默抄低幫助記對白，所以拍攝場地周圍都係我寫過嘅紙。為演好角色，我仲走咗去新聞部借錄影廠練習咗好多日。如果唔練習，我都冇信心，好難演。（有興趣成為新聞主播？）我都有興趣客串報天氣。」

阿佘表示已沒欠無綫劇債，如再遇上好劇本，會再回巢拍劇。談到一班同劇後輩，她直言很喜歡王敏奕︰「佢第一日埋位已準備得好好。第一日同佢開工，佢已投入角色，演出感動到我。佢唔止同我有化學作用，仲好強，所以我好鍾意佢。」

至於有哪位演員有待進步，阿佘笑道：「我自己啦，沒有最好，只有更好嘛！」

被點名稱讚的王敏奕說：「我都好多謝佢，當初收到劇本，我做好多功課，因為知道可以同阿佘對戲，我都好緊張，戰戰兢兢咁去做，咩都唔理，做好自己先。第一日拍時，我超級緊張，阿佘拍完都有同我傾，好感動。」

她覺得阿佘氣場勁，人又正又靚，每次望住對方雙眼就被迷魂到不會演戲，王敏奕說：「阿佘係個非常慷慨嘅前輩，不論喺演戲或生活上，都好歡迎大家去問佢，唔會令人有種接觸不到嘅感覺。」

新聞女王｜馬國明逢人黑面 唯獨畀面舊情人李施嬅

馬國明、李施嬅在TVB新劇《新聞女王》中有不少吵架場面，李施嬅更要鬧佘詩曼，令現實中很喜歡對方的她有點困難。她說︰「呢套劇係我入行以來鬧人鬧得最多嘅。最困難係背新聞稿，有段戲嘅對白要背1個月。我要以新聞主播黃曉瑩為模仿對象，學習報新聞節奏。」

馬國明認為最困難是拍攝時要經常望住鏡頭講對白︰「拍劇多年習慣唔望鏡，感覺好怪，要時間適應。」談到與李施嬅的感情線，他說︰「我喺劇入面對住每個人都黑面，唯獨對住李施嬅呢箇舊情人唔會。」

李施嬅透露二人只是內心感情激烈，真正激烈戲就留給何依婷。

何依婷透露與馬國明的激情戲是她人生最激的一次：「對我嚟講係新嘅尺度，以往都係蜻蜓點水式，今次係比較劇烈，有啲動作同意識形態。好彩馬國明係好犀利嘅前輩，好有經驗，知演到邊個位就夠。」