01娛樂節目《摸杯底》邀請黎諾懿擔任嘉賓。黎諾懿現時已是無綫當家小生之一，又有擔任節目主持、監製等，身兼多職，事業發展相當順利。而家庭方面，黎諾懿與太太李潔瑩結婚多年恩愛如昔，兩人育有兩個寶貝仔，一家四口幸福美滿。

事業家庭雙豐收的黎諾懿看似是「人生勝利組」，但入行21年的他並非一帆風順，甚至一度被嘲是奀星，令他耿耿於懷：「而家都有咁樣寫，但係而家年紀大咗，好想做到古會長（古天樂）咁，再努力啲，冇辦法，每個人嘅先後次序都唔一樣！」

自認靚仔報讀藝員訓練班　因似陳百強獲賞識成功入讀 黎諾懿在入行前曾任職銀行，但就在一次機緣巧合之下，決定報讀無綫電視第18期藝員訓練班：「嗰陣時咁啱對面嘅姐姐有本TVB周刊，而家呢一本周刊就冇咗㗎啦！咁啱一打開見到藝員訓練班喎！不如轉一個行業完全冇做過，諗住後生同埋自認都係靚仔，不過選嘅時候唔靚好肥，就試嚇啦！」

他續指其實入到訓練班是天意，並分享：「點解我覺得係天意呢？其實嗰陣時係我入唔到㗎，因為嗰陣時英皇新秀大賽，有四個參賽者退選。我係候補再候補，訓練班負責人覺得我好似陳百強先生。嗰陣時嘅我入行好怕丑，所有動靜同你講嘢嘅Tone都有啲似Danny仔，所以係成功候補入到，如果唔係我諗我都係做返銀行！」

對於入兒童組不滿　曾大鬧TVB 8樓高層

自藝訓班畢業後，他加入TVB大家庭，更在劇集《當四葉草碰上劍尖時》中擔正男主角，其後在2004年雅典奧運時，又被無綫安排與林峯、黃宗澤、馬國明、吳卓羲及陳鍵鋒組成「奧運六星」，備受力捧。

事業看似順風順水，但他卻突然被安排調去兒童組，令他大受挫折：「我唔聽人講嘢，到而家都唔鍾意聽人講嘢！人大咗成熟咗，你唔覺得我唔聽你講嘢。唔夠成熟，遇到高層我都會咁做，我係李小龍先生嘅忠實粉絲，我唔會蝦平輩，淨係蝦上面，我哋8樓叫做經理人部門，我真係試過大鬧8樓，你問所有嘅經理人同一啲舊有嘅藝人，嗰陣時我調去兒童組，成個部門翻艇咁滯。我諗緊做緊劉德華、古天樂、梁朝偉嘅時候，你叫我入兒童組！我覺得不如唔撈，嘈得好勁，我會覺得係你哋唔識，唔係我問題，好多呢啲嘢！」

被問到調到兒童組的最大主因，他說：「有陣時上班有啲嘢真係冇得撒賴，你做嘅所有嘢人哋都唔係好認同，無論你拍劇又好，好多人都覺得你好幼嫩，你講嘢又好多懶音，一個字都聽唔清楚，個樣又成日都瞓醒都唔知你做緊乜嘢，但係你又覺得自己冇問題！我會覺得我冇問題，但人大咗就會發覺人哋都係想提點你。」

獲湖南衛視節目組邀約參加《舞動奇蹟》　爆紅人氣片酬急升

他憶起在入行10年後，曾打算轉行，卻幸運得到湖南衛視節目組賞識。他說：「突然之間湖南衛視有兩個女仔打嚟問諾懿大哥上嚟跳舞呀！嗰陣時呢我話唔好玩啦，我真係諗住離開呢行，決定離開呢一行，因為做咗10年決定要養家。點解我會上去湖南衛視係因為國內嘅錢都頗大，《舞動奇蹟》我拍四集係完全能夠還曬TVB嘅嘢，好嚟好去，完咗就走！」

他特別鳴謝在節目《舞動奇蹟》中能遇上好隊友，內地演員金晨。

與富家女李潔瑩拍拖被嘲「軟飯王」　無懼流言變「五億女婿」

2014年黎諾懿與落選港姐李潔瑩結婚，但因女方是富家女，其父親任職美容公司總經理，身家逾五億，兩人家境懸殊，所以黎諾懿一度被外界指是貪圖女方身家，更被網民封為「五億女婿」，甚至嘲笑他「食軟飯」。

但他就坦言完全不介意：「你見我有冇解釋過，我真係冇解釋過，後期我就話軟飯係自己食，唔使畀大家食。嗰陣時大家問我有幾多億，我就話有幾多億都好，我唔會分畀大家，所以大家都唔需要咁關心我啲錢。我係好後期先講，前期嘅時候我冇講。」

他續指：「我淨係會擔心佢爹哋媽咪同埋我爹哋媽咪會點諗，如果大家嘅屋企人都唔介意，就冇嘢要解釋。如果我成日都要介意人哋諗咩，人哋點講我會好辛苦，冇必要理人，我同Nicole開心就得。」