43岁袁伟豪努力保养！自认大叔仍不忿网民为流量嘲衰老

为了保养兼凑囝囝，Ben更调整了作息时间，“我平均夜晚12点半度就瞓，以前系3、4点都唔瞓，家唔使开工我都会咁早瞓，尽量7、8点就起身，上午去做运动，晨操完返嚟就去凑BB，陪吓屋企人，夜晚就cut应酬，食饭7点食到10点返屋企，唔会玩到好夜，靠呢啲嚟保养。”

计划为囝囝追个妹

讲到升呢人父，Ben坦认责任大了，连揸快车都会有内疚感，“上年（张）宝儿陀咗 3、4个月，啱啱公布咗有BB，我同振朗去咗欧洲拍《欧洲铁骑游》，我喺德国嗰条冇限速公路揸到200几公里，揸住机车爽㗎！

听见啲引擎声，又有啲风，见到个表180、200、220咁上，完成咗嗰个速度好正，但系之后嗰几秒就觉得好内疚，即刻就谂我嗰吓炒车，我个人就散，BB点呢？！都未见到我，我就唔喺度咁点算呢？！觉得有啲嘢，唔使去到咁尽，年少时试过呢啲嘢就算嘞！”

Ben提到袁咕碌就冧晒，开心透露听到囝囝识叫“爹爹”一刻劲兴奋，更期待等囝囝大点一齐坐机车。他又计划2、3年后为袁咕碌追个妹妹。